Skôlasetning skólaársins 2020-2021 verður mánudaginn 24. ágúst í sal Víkurhússins. Hver hópur kemur sér, fyrsti kl. 9, næsti kl. 10, þriðji kl. 11 og fjórði hópurinn kemur kl. 13. Nánari upplýsingar eru í tölvupóstinum sem sendur var í síðustu viku.

Foreldrar, upplýsingar um skipulag skólahalds í Hlíðarskóla næstu þrjár vikur eru komnar til ykkar í tölvupóstinum.

Starfsdagur í grunn- og leikskólum Akureyrarbæjar mánudaginn 16. mars

Eins og komið hefur fram í fjölmiðlum í dag hefur heilbrigðisráðherra ákveðið að virkja heimildir sóttvarnalaga sem fela m.a. í sér að skólahald verður takmarkað tímabundið. Nánari útfærslur verða unnar samkvæmt tilmælum stjórnvalda.

Í ljósi þessa hefur verið ákveðið að mánudaginn 16. mars verði starfsdagur í leik- og grunnskólum Akureyrarbæjar svo stjórnendur og starfsfólk geti skipulagt skólastarfið sem best á þessu tímabili sem takmörkunin nær til. Foreldrar leik- og grunnskólabarna eru beðnir að fylgjast vel með upplýsingum sem birtast munu um helgina og á mánudaginn m.a. á heimasíðu Akureyrarbæjar og heimasíðum grunn- og leikskóla.

Ágætu foreldrar.

Viðbragðsáætlanir vegna covid 19 eru komnar á vefinn. Um er að ræða viðbragðáætlun Hlíðarskóla og viðbragðsáætlun landlæknis. Foreldrar eru beðnir um að kynna sér þær vel.

Foreldrar, upplýsingar um stöðuna í Hlíðarskóla ef til verkfalls kemur eru komnar til ykkar í tölvupóstinum.

Vegna COVID-19 veirunnar

04.03.2020

Í ljósi þess að hættustigi almannavarna hefur verið lýst yfir vegna COVID-19 kórónaveirunnar vill Hlíðarskóli árétta áherslur almannavarnadeildar ríkislögreglustjóra um mikilvægi þess að allir fylgi leiðbeiningum sóttvarnarlæknis. Nýjustu upplýsingar eru ávallt að finna á vef Landlæknisembættisins:  www.landlaeknir.is

Heilsugæslan hvetur foreldra til að fylgjast vel með ráðleggingum frá sóttvarnalækni og tilkynningum frá almannavörnum og skólastjórnendum um viðbrögð þar sem þau kunna að breytast frá degi til dags.

Smit af völdum veirunnar berst aðallega sem snertismit og er besta smitvörnin fólgin í handþvotti, sprittun og að forðast snertingu við aðra. Heilsugæslan hvetur foreldra til að brýna mikilvægi handþvottar við börn sín og halda snertingu við aðra í lágmarki.

Einstaklingar sem finna fyrir einkennum og hafa mögulega verið útsettir fyrir smiti t.d. vegna ferðalaga eru hvattir til að hringja í síma 1700 og fá leiðbeiningar eða Heilsugæsluna 432-4600. Þeir sem verið hafa í nánu samneyti við einstaklinga með staðfesta eða líklega sýkingu verða settir í sóttkví og hið sama á við um þá sem ferðast hafa á undanförnum dögum til skilgreindra hættusvæða.

Helstu einkenni eru hósti, hiti og beinverkir. Ef veikindi koma upp og grunur leikur á smiti hjá skólabarni, í fjölskyldunni eða hjá þeim sem fjölskyldan hefur umgengist þá vinsamlegast hringið í síma 1700 eða á næstu heilsugæslustöð og fáið upplýsingar um hvert skal leita ef grunur er á smiti. Ekki mæta á bráðamóttöku, læknavakt eða heilsugæslu ef grunur er um smit án þess að hringja á undan.

Foreldrum barna með skert ónæmiskerfi eða undirliggjandi öndunarfærasjúkdóma er ráðlagt af heilbrigðisyfirvöldum að ráðfæra sig við viðkomandi sérfræðing eða heimilislækni.

Foreldrar eru beðnir um að fylgjast reglulega með nýjustu upplýsingum um þau svæði sem skilgreind eru sem hættusvæði. Ef börn eða fjölskyldur þeirra ferðast um þau svæði, þurfa þau fara í sóttkví skv. leiðbeiningum Landlæknis.
https://www.landlaeknir.is/koronaveira/

Á morgun, miðvikudag 26.02.20 er starfsdagur og á fimmtudag og föstudag er vetrarfrí í öllum grunnskólum bæjarins. Kennsla hefst aftur mánudaginn 02.03.20 á venjulegum tíma. Njótið frísins ?

Tilkynning frá fræðslustjóra:

Að höfðu samráði við lögreglu er ekki talin ástæða til að grípa til aðgerða á grundvelli veðurspár fyrir morgundaginn. Fólk er beðið um að fylgjast með heimasíðum skólanna og Akureyrarbæjar ef til þess kemur að röskun verði á skólahaldi.