Hlíðarskóli Akureyri

Það var heldur betur líf og fjör í skólanum á dögunum þegar árlegir þemadagar fóru fram. Að þessu sinni var unnið með afar mikilvæg og skemmtileg þemu, en sjónum var beint að vaxtarhugarfari ásamt réttindum og skyldum barna samkvæmt Barnasáttmála Sameinuðu þjóðanna

Nemendur unnu saman í hópum þvert á aldur. Það var gaman að fylgjast með eldri nemendunum leiðbeina þeim yngri og hvernig allir hjálpuðust að við að leysa fjölbreytt og krefjandi verkefni. Viðfangsefnin voru eins mismunandi og þau voru mörg, en öll miðuðu þau að því að efla sjálfsmynd, samvinnu og skilning á réttindum hvers annars.

Nemendur fóru til að mynda í mikla sjálfsrýni og unnu með eigin styrkleika. Þá var mikið um skapandi vinnu þar sem krakkamir gerðu stutt myndbönd og myndasögur. Sögurnar fjölluðu flestar um sögupersónu sem mætti erfiðri áskorun í lífinu en tókst að vinna sig í gegnum hana með vaxtarhugarfari og góðri hjálp frá vinum sínum. Með þessu lærðu krakkarnir að alvöru áskoranir eru góð tækifæri til að læra og vaxa, frekar en eitthvað til að hræðast. Nemendur bjuggu einnig til stórglæsileg styrkleikaspjöld sem munu nýtast vel áfram.

Unnið var stórt samvinnulistaverk þar sem allir nemendur skólans lögðu sitt af mörkum. Sjá má afrakstur þessarar  vinnu í matsal skólans. Um er að ræða stórglæsilegt tré sem geymir fullt af góðum ráðum, jákvæðum orðum til annarra, hvatningu og mismunandi styrkleikum.

Þessir þemadagar voru góð áminning um það hvað gerist þegar við vinnum saman, styðjum hvert annað og mætum deginum með rétta hugarfarið. Hvetjum alla foreldra og forráðamenn til að kíkja á stóra tréð í matsalnum næst þegar leiðin liggur í skólann!

Hér er hlekkur á myndaalbúm frá þemadögunum. https://photos.app.goo.gl/HFDPtWKiN9pqzvVK9

Skólaráðsfundur 02.10.2026

Mæting : Valdimar, Guðmudur, Stefán, Halldór og Sonja fulltrúi foreldra var á Teams
Svanur fulltrúi nærumhverfis afboðaði komu sína.

Mál á dagskrá:

• Kynning á skólanámskrá og starfsáætlun
  Starfsaaetlun-Hlidarskola-2026-2027.pdf
• Skolanamskra-Hlidarskola.pdf
  
  Farið er yfir starfsáætlun skólans. Hefur farið í gegnum og verið samþykkt af fræðslu og lýðheilsusvið. Rætt er um skóladagatalið. Óskað er eftir nokkrum breytingum. 20.nóvember er uppbrotsdagur og er óskað eftir að breyta því í venjulegan dag. Starfsdagur sem að var 9.febrúar er færður. Ástæða breytinga er vegna starfsmannaferðar í endurmenntunarferð til Prag.
  Vorleikar færist um mánuð. Ákvörðun um þessar breytingar er samþykkt einróma.
  Valdimar mun senda ákvörðun um breytingar á fræðslu og lýðheilsusvið.
  
  Fara yfir skólareglur
• Almennar-skolareglur-Hlidarskola.pdf
  
  Farið er yfir skólareglur. Reglur einróma samþykktar.
  
• Endruskoðun á stefnu skólans.
  Skolanamskra-Hlidarskola.pdf  bls 6
  
  Farið er yfir stefnu skólans. Valdimar kemur með tillögu að einföldum texta. Það er samþykkt að farið verði í þá vinnu.
  Texti í stefna og meginmarkmið þarf lagfæringu. Innihaldið skal haldast óbreytt og texti verði yfirfærður, einfaldaður og lagaður.  Þær tillögur eru samþykktar einróma.
  
• Skóladagatal og breytingar.
  Hlidarskoli-skoladagatal-26-27-endurskodad.pdf
  
  Rætt er um skóladagatalið. Óskað er eftir nokkrum breytingum. 20.nóvember er uppbrotsdagur og er óskað eftir að breyta því í venjulegan dag. Starfsdagur sem að var 9.febrúar er færður. Ástæða breytinga er vegna starfsmannaferðar í endurmenntunarferð til Prag.
  Vorleikar færist um mánuð. Ákvörðun um þessar breytingar er samþykkt einróma.
  Valdimar mun senda ákvörðun um breytingar á fræðslu og lýðheilsusvið.
  
  
• Önnur erindi sem hafa komið í upphafi skólaárs.
  

Valdimar hefur það frá smið að framkvæmdir sem að standa yfir í Skildi séu áætlaðar að taka um 2 vikur og geti húsið verið opnað aftur til notkunar eftir það.

Nemendaráð hittist fyrir 2 vikum og fengu hugmyndir af umbunum fyrir Tröllastig og eru að vinna í að undirbúa skjal til að sýna öðrum nemendum sem að mun hanga inn í eldhúsi. 

Hlíðarskóli vinnur að því að verða réttindaskóli Unicef og eru að vinna samkvæmt aðgerðaáætlun. Stefnt verði að því að Hlíðarskóli leggi inn formlega beiðni og ef allt gengur eftir verður hlíðarskóli fyrsta sérúrræði á Íslandi til að hljóta titilinn réttindaskóli Unicef.

Fundi slitið.

Starfsáætlun nemenda og réttindaráðs Hlíðarskóla 2026-2027

1.Fundur 18.9.2026: Mættir eru: Stefán, Inga, Magnús, Atli og Valdimar Skólastjóri.

• Fyrsta mál var að skipa í embætti: formaður og varaformaður, ritari
  • Inga ritari, Stefán formaður, Atli varaformaður, Maggi meðstjórnandi, Valdi(skólastjóri) fundarstjóri. 
    
    
• Þarfagreining: Hvað viljum við skoða og vita um skólastarfið
  • Fá hugmyndir að umbun, gera könnun hvað gerir skólann betri, 
  • Dóta dagur, tölvutími, öðruvísi morgunmatur, ísbúðaferð, bíó dag, fara í skautahöll, frjálst nesti, frjáls tími, daladýrð, sleppa sund, velja mat, subway, síma dagur, dýra dagur, minecraft, fortnight, bökunar keppni, kahoot dagur. Frjáls íþrótta tími,
    • Skólaráð ákveður að hafa umbun á 300 stiga fresti. Hafa blað frammi til að sýna hvaða umbun er næst. Byrjum á frjálst nesti svo frjálsan íþróttatími, Frjáls fyrstu 2 tímar á föstudegi, Öðruvísi morgunmatur, Kahoot dagur, 
      
      
• Hvernig er best að fá vita óskir nemenda? 
  • Fara í stofur og spyrja, könnun á netinu, hugmynda kassi
    
    
• Athuga hvort allar stofur séu með barnasáttmála sem tryggir “réttindi og óskir nemenda” 12.gr barnasáttmálans um rétt barna til að láta skoðanir sínar í ljós. 
  • Stofa 1 bekkjarsáttmála
  • Stofa 2 er með tilbúin en þarf að koma honum upp
  • Stofu 3 vantar sáttmála en hann var kominn í lok dags.
  • Stofa 4 er með sáttmála upp á vegg.

Fundi slitið

Skólastarfið fór afar vel af stað og óhætt er að segja að síðustu dagar hafi verið hlaðnir fjölbreyttum, flottum og skemmtilegum verkefnum. Starfið það sem af var var einstaklega líflegt og einkenndist af mikilli gleði og samvinnu meðal nemenda og starfsfólks. Markmið vikunnar var fyrst og fremst að hrista hópinn vel saman, hlúa að skólasamfélaginu og leggja grunninn að góðu samstarfi fyrir veturinn. Í því samhengi var mikið fjallað um mikilvægi góðra samskipta, virðingu og jákvæða framkomu í garð annarra, sem skapaði frábæran tón fyrir allt starfið.

Einn af hápunktum vikunnar var hinn árlegi göngudagur skólans. Veðurguðirnir léku við okkur og dásamleg sól og blíða fylgdi hópnum allan daginn. Gengið var sem leið liggur inn í Kjarnaskóg þar sem nemendur nutu þess að leika sér og spreyta sig á ýmsum þrautum í skóginum. Eftir góða hreyfingu og útiveru var kveikt á grillinu og boðið upp á rjúkandi heita og ljúffenga hamborgara sem ruku út við mikla hrifningu allra viðstaddra. Skógurinn ómaði af hlátri og spjalli og það sýndi sig fljótt hversu dýrmætir svona dagar eru fyrir hópinn.

Ævintýrin héldu áfram þegar nemendur fóru í eftirminnilega siglingu með eikarbátnum Húna. Þar fengu krakkarnir áhugaverða fræðslu um hafið, lífríkið og sögu bátsins sjálfs. Spennan náði hámarki þegar færin voru lögð og nemendur fengu að spreyta sig á veiðum. Brakandi blíða og spegilsléttur sjór var á firðinum og nýveiddur fiskurinn var svo grillaður um borð og vakti mikla lukku. Þessi fræðandi og skemmtilega ferð stóð fyrir sínu og skilaði dýpri skilningi á nágrenni okkar og náttúrunni.

Ásamt þessum stóru viðburðum hófst valið formlega í vikunni. Valtímar skólans fóru mjög vel af stað og var virkilega gaman að sjá hversu fjölbreytt og flott val var í boði þessa vikuna. Nemendur mættu fullir áhuga og sköpunargleði í sínar greinar og ljóst er að þar mun margt spennandi eiga sér stað á komandi vikum.

Við lítum til baka á góða og árangursríka viku þar sem hópurinn þjappaðist saman. Við tökum framfaraskref með hverri vikunni, enda er nóg af skemmtilegum og krefjandi verkefnum framundan í skólastarfinu. Við þökkum nemendum kærlega fyrir vikuna og hlökkum til þeirrar næstu.

Til að sjá fleiri myndir frá dögunum þá má ýta á hlekkinn hér fyrir neðan.

Myndir

Eins og fram hefur komið í fjölmiðlum greindist mygla í efra húsi skólans, Skildi. Það þýðir að tímabundið hefur þrengt að okkur og við þurfum að aðlaga skólastarfið að breyttum aðstæðum.

Umsjónarmenn fasteigna Akureyrarbæjar brugðust hratt og vel við og vinna við húsnæðið fór strax af stað. Hvað sú vinna mun taka langan tíma höfum við ekki upplýsingar um en vonandi skýrist það á næstu dögum.

En þegar svona kemur upp að þá kemur í ljós hversu mikilvæg það var að fara í uppbyggingu á útisvæði skólans. Útisvæðið var ekki glæsilegt fyrir nokkrum árum en Akureyrarbær hefur bætt verulega í og sú fjárfesting er heldur betur að skila sér. Við höfum frábær leiksvæði, gróðurhús, góða möguleika til útináms og síðast en ekki síst einstaka náttúru allt í kringum okkur.

En þó að þrengt sé að okkur í húsnæðismálum að þá byrjaði skólastarfið með krafti í dag.

Við búum svo vel að eiga frábært og lausnamiðað starfsfólk sem er staðráðið í að veita nemendum bestu mögulega þjónustu þrátt fyrir að stór partur af aðstöðu Hlíðarskóla sé dottinn út um óákveðinn tíma. Í mínum huga er starfsfólk Hlíðarskóla á heimsmælikvarða þegar kemur að því að vinna með nemendum með margþættan vanda og það sá ég svo skýrt í dag. Okkar fyrstu dagar hér í skólanum fara í að hrista hópinn saman og mynda liðsheild. Vinna í tengslamyndun svo að hér myndist traust og gagnkvæm virðing milli starfsfólks og nemenda. Þeir nemendur sem voru hérna hjá okkur seinasta vetur komu inn með mikilli ró og voru flottar fyrirmyndir fyrir nýja nemendur. Nýjir nemendur munu þurfa tíma til að aðlagast og læra inn á hlutina í Hlíðarskóla en hafa flottar fyrirmyndir í eldri nemendum.

Við munum gera okkar allra besta til þess að nýta umhverfið eins vel og við getum til framúrskarandi skólastarfs. Vissulega hefðum við kosið að hefja skólaárið við aðrar aðstæður.
Skóli og skólastarf þarf gott og hentugt húsnæði, en það er ekki húsnæðið eitt og sér sem skapar töfra skólastarfsins. Töfrarnir verða til í fallegum og heilbrigðum samskiptum nemenda og starfsfólks, í góðum skólabrag og í ögrandi og fjölbreyttu námsumhverfi þar sem nemendur fá tækifæri til að vaxa, takast á við áskoranir og njóta sín. Þar eru einkunnarorð skólans gleði, virðing og jákvæðni er haft að leiðarljósi.

Valdimar Heiðar Valsson

Stoltur skólastjóri Hlíðarskóla

Skólasetning fer fram mánudaginn 24. ágúst klukkan 10:00. Þess er farið á leit við nemendur að þeir mæti í fylgd foreldra eða forráðamanna sinna.

Við skólasetninguna fá fjölskyldur afhentar allar helstu upplýsingar er varða komandi skólaár, m.a. stundatöflur, upplýsingar um skipulag á akstri til og frá skóla, skólareglur og skóladagatal.

Þá eru foreldrar vinsamlegast beðnir um að eiga samtal við Signýju, fjölskylduráðgjafa skólans, í þeim tilgangi að fá úthlutað viðtalstíma vegna fyrirhugaðs foreldrasamstarfs á skólaárinu.

Hlökkum til að taka á móti ykkur.

Skóli hefst svo samkvæmt stundaskrá þriðjudaginn 25.ágúst.

Venju samkvæmt var margt um að vera síðustu vikur skólaársins í Hlíðarskóla. Nemendur og starfsfólk nutu fjölbreyttra verkefna og viðburða sem settu skemmtilegan svip á lokasprettinn.

Bekkir skólans fóru í dagsferðir sem heppnuðust afar vel. Ferðirnar gáfu nemendum tækifæri til að efla samveru, upplifa nýtt umhverfi og skapa góðar minningar með skólafélögum sínum.

Þemadagar voru á sínum stað þar sem nemendur fengu að takast á við fjölbreytt verkefni og vinna saman á skapandi og skemmtilegan hátt. Þá fóru nemendur einnig í íþróttatíma í Skautahöllinni þar sem þeir fengu að reyna fyrir sér á skautum og njóta hreyfingar í nýju umhverfi. Farið var í heimsókn í 600 klifur auk þess sem farin var umbunarferð í Daladýrð þar sem nemendur sem höfðu safnað tilskildum fjölda Trölla fengu verðskuldaða viðurkenningu. Ferðin var einstaklega vel heppnuð og vakti mikla ánægju meðal þátttakenda. Þetta er aðeins brot af því sem einkenndi síðustu vikur skólaársins.

Lokadagar skólaársins voru því bæði viðburðaríkir og ánægjulegir og skildu eftir margar góðar minningar hjá nemendum og starfsfólki áður en sumarfríið tók við.

Myndaalbúm frá vordögum 2026

Skólaslit Hlíðarskóla fóru fram mánudaginn 9. júní við hátíðlega athöfn þar sem nemendur, starfsfólk og fjölskyldur komu saman og fögnuðu lokum skólaársins.

Við þetta tækifæri voru fimm nemendur úr 10. bekk útskrifaðir úr grunnskóla. Við óskum þeim innilega til hamingju með áfangann og óskum þeim alls hins besta á nýjum vettvangi í framhaldsskóla.

Einnig voru tveir starfsfélagar kvaddir við athöfnina, þeir Sævar Helgi og Bjössi. Þeim voru færðar þakkir fyrir góð og farsæl störf í þágu skólans og nemenda hans. Við þökkum þeim kærlega fyrir samstarfið og óskum þeim velfarnaðar á komandi árum.

Hlíðarskóli óskar öllum nemendum, starfsfólki og fjölskyldum gleðilegs sumars og hlakkar til að taka á móti nemendum að nýju á komandi skólaári.

Fleiri myndir frá skólaslitum má sjá hér.

Miðvikudaginn 27. maí fór hið árlega góðgerðarhlaup Hlíðarskóla fram.

Þetta var í fimmta skipti sem nemendur í Hlíðarskóla leggja málefnum barna á landinu lið. Áður hafa þeir styrkt félag aðstandendra langveikra barna, krabbameinsfélag Akureyrar og nágrennis, ADHD samtökin í fyrra. Fyrir tveimur árum söfnuðu þau fyrir bættri aðstöðu á skólalóðinni hér í skólanum.

Nemendur skólans fara upp og niður heimreið skólans, um það bil 500 m. Hver ferð er því kílómeter og þeir hafa klukkutíma til að fara eins margar ferðir og þeir geta gangandi eða hlaupandi.

Að þessu sinni var það barnadeild Sjúkrahússins á Akureyri sem krakkarnir söfnuðu fyrir. Samtals söfnuðust 205.700 krónur sem vonandi koma að góðum notum.

Gestur Guðrúnarson þjónustustjóri á SAk veitti styrknum viðtöku fyrir hönd barnadeildarinnar.

.

Hér eru fleiri myndir frá hlaupinu

Þriðjudaginn 9. júní klukkan 10:00 verða skólaslit í Hlíðarskóla haldin og viljum við bjóða foreldrum að koma og eiga þessa stund með okkur.

Við hvetjum alla til að mæta með börnunum sínum og slíta skólaárinu saman með starfsfólki og öðrum nemendum. Skólaslitin eru mikilvæg stund þar sem við lítum yfir veturinn, fögnum því sem áunnist hefur og kveðjum skólaárið og förum glöð út í sumarið.

Suma nemendur og foreldra sjáum við aftur að hausti þegar nýtt skólaár hefst, en aðra nemendur og foreldra kveðjum við nú þegar þau halda áfram inn í nýjan kafla í lífi sínu. Við erum þakklát fyrir samveruna, samstarfið og allt það sem þetta skólaár hefur fært okkur.

Við hlökkum til að sjá ykkur og eiga notalega stund saman.