Category: Óflokkað

Skólaráðsfundur 27.02.2026

Viðstaddir: Valdimar skólastjóri, Guðmundur fyrir hönd kennara, Halldór fyrir hönd annarra starfsmanna, Karen fyrir hönd foreldra, Rósa fyrir hönd nemenda og Natan fyrir hönd nemenda.

1. Skóladagatal fyrir veturinn 2026-2027 lagt fram og yfirfarið. Borið upp til samþykktar og samþykkt einróma.
2. Réttindaskóli UNICIEF. Valdimar fer yfir verkefnið og hvar það er statt. Spurningarlistar hafa verið lagðir fyrir nemendur. Næst á dagskrá er að gera öryggiskönnun. Það er talað um að hún sé framkvæmd í hóp. Spurningarnar spyrja um viðkvæm málefni þannig eftir að hafa skoðað listan að þá erum við í samtali við UNICIEF um hvort hægt sé að gera þetta öðruvísi. Mögulega hægt að gera einstaklings könnun en slíkt myndi tefja ferlið að sá sem leggur fyrir listan þurfi að gera það með hverjum og einum nemanda. Þegar niðurstöður úr báðum könnunum nemenda og öryggis að þá mun Valdimar skólastjóri og Nemendaráðið skoða niðurstöðurnar og út frá þeim gera aðgerðaráætlun til að vinna í þeim málum sem þarf að gera betur í. Það má segja að sú vinna sé að hluta til farin af stað því haldið var nemendaþing í nóvember þar sem nemendur ræddu ótal atriði tengdu skólanum. Hvað þau eru ánægð með og hvað má betur fara. Búið er að taka helstu niðurstöður saman og er unnið að úrbótum.
3. Farið var yfir útivistardaginn sem gekk mjög vel. Fengum gott veður og allt gekk að óskum.
4. Árshátíð er í fullum gangi. Allar stofur eru farnar að vinna hugmyndavinnu að sínum atriðum. Árshátíðin verður 26.mars
5. Farið var yfir rekstrarárið 2025 fyrir Hlíðarskóla. Áætlaðar voru rúmar 206 milljónir fyrir skólaárið 2025. Við enduðum í 209 milljónum sem er framúrkeyrsla upp á 1.28 prósent sem verður að teljast nokkuð gott þó viðmiðið sé alltaf að standast áætlun.
6. Farið var yfir komandi viðburði á skóladagatali. Næsti skerti dagur er 16.mars og hefur yfirskriftina stærðfræði í daglegu lífi. Þar verður þema dagsins stærðfræði og hún tengd við daglegt líf svo nemendur komi augu á hvernig hún nýtist dagsdaglega. Árshátíðin er svo eins og áður var sagt 26. mars. 
7. Undir önnur mál var rætt að þeir nemendur sem eru í nemendaráðinu eru að útskrifast í vor. Það er því útlit fyrir að það þurfi að fá nýja nemendur í réttinda/nemendaráðið til að halda áfram þeirri góðu vinnu sem hefur farið fram þar.

Fundi slitið.

Fimmtudaginn 12 febrúar var útivistardagur hjá okkur og nutu allir nemendur og starfsmenn dagsins í Hlíðarfjalli. Við gátum ekki beðið um betra veður, það var kalt en gott næstum allan tímann en kom smá vindur og snjókoma síðasta rúmlega klukkutímann. Við deildum fjallinu með öðrum skóla sem var mjög skemmtilegt þar sem margir nemendur þekktu einhverja eða áttu systkini þar. Okkar nemendur nutu dagsins ýmist á skíðum, gönguskíðum eða sleðum og fóru bæði nemendur og starfsfólk glaðir heim eftir daginn þar sem hann gekk glimrandi vel. Fleiri myndir af deginum er hægt að skoða hér.

Lærum í leik fór fram hér í Hlíðarskóla og tókst vægast sagt vel. Nemendur þurftu að leysa þrautir fimm stofum í anda „escape room“. Fyrir hverja þraut sem þau leystu komust þau úr herberginu sem þau voru í og með vísbendingu sem voru stafir. Stafirnir voru síðan notaðir til að setja saman leyniorð sem nemendur sögðu Karen frá og fengu í kjölfarið blað með spurningum og ipad. Rétt svör við spurningunum mynduðu kóða sem nota átti til að opna ipadinn. Sá hópur sem myndi fyrstur ná að opna ipadinn myndi sigra. Mikil spenna var þegar allir hópar voru komnir í matsalinn, hver í sínu horni, að reyna opna sinn ipad.

Undirbúningur dagsins var skemmtilegur en dagurinn sjálfur ennþá betri, miðað við virkni og þátttöku má áætla að svipað fyrirkomulag verði endurtekið við tækifæri. Myndir frá deginum má finna hér.

Þá er fyrsti mánuður ársins búin og var mikið brasað skemmtilegt í Hlíðarskóla.

Við byrjuðum á stórglæsilegri þrettándabrennu sem sló heldur betur í gegn, enda gott að byrja árið á smá útiveru og samverustund. Guðmundur list-og verkgreinakennari náði að fara með flesta nemendur í heimsókn í Fablab í Verkmenntaskólanum sem var mjög áhugavert og mun hann reyna fara með þá sem eru eftir í febrúar mánuði. Valtímarnir eru á sínum stað og hefur slegið í gegn að fara meðal annars í pílu en Orri fór með nokkra á kynningu hjá Ferro Zink að skoða aðstöðuna þeirra.

Krakkarnir náðu að safna saman nægilega mörgum tröllastigum til að fara í 600klifur í hópumbun og þótti það virkilega gaman. Allir byrjuðu í litla salnum í grjótaglímu en svo var hópnum skipt niður og fengu þau að prufa línuklifur ásamt grótaglímu í stóra salnum.

Þar sem gleymdist að setja inn myndalbúmið fyrir desember þá er það að finna hér og myndaalbúmið fyrir janúar er hér.

Nú er hafið spennandi og skapandi þróunarverkefni þar sem Guðmundur smíðakennari leiðir nemendur saman í sameiginlegu verkefni þar sem nemendur smíða svokallað bamba-húsi.

Verkefnið hófst þegar skólinn fékk að gjöf nokkra bamba – en bambar eru stálgrindur sem venjulega eru utan um plasttanka (IBC-tanka). Við höfðum séð fyrirmyndir af svo kölluðum bamba húsum og vildum spreyta okkur á að gera eitt slíkt. Þetta myndi líka nýtast skólanum því oft er pláss að skornum skammti og því kæmi geymslu skúr sér vel á skólalóðinni.

Með hjálp gerfigreindar var hafist handa við að undirbúa verkefnið. Við erum sátt með niðurstöðuna. Húsið verður klætt að utan með timbri þar sem börkurinn snýr út – þannig að húsið minnir á náttúrulegt, hrátt tré og fellur vel inn í umhverfið. Þakið verður A-laga með bárujárni og byggingin verður á einni hæð, einföld og traust.

Það sem gerir verkefnið sérstaklega skemmtilegt er að allir nemendur koma að smíðinni 3-10.bekkur. Hver og einn fær hlutverk við hæfi:
– mælingar og skipulag
– samsetningu grindar
– festingar og styrkingar
– klæðning, frágang og útlitshugsun

Þannig verður verkefnið ekki aðeins smíðaverkefni, heldur lærdómsferli um samvinnu, lausnaleit, endurvinnslu og sjálfbærni.

Markmiðið er ekki bara að byggja hús – heldur að byggja þekkingu, sjálfstraust og sjálfbæra skólamenningu, þar sem hugmyndir nemenda verða að raunverulegum hlutum í umhverfi skólans.

Meðfylgjandi eru myndir af áætlun verkefnisins, hugmyndum að mögulegri lokaútkomu og einnig myndir frá vinnu nemenda.

Við erum afskaplega stoltur af þessu verkefni þar sem við sýnum nemendum að hugmyndir geta orðið að veruleika ef maður er tilbúin að leggja á sig vinnuna og láta verkin tala.

Við munum sýna ykkur frá framvindu mála með þetta verkefni. Einnig langar okkur að athuga hvort það eru einhverjir velunnarar þarna úti sem langar að leggja skólanum lið með þetta stórskemmtilega verkefni. Svona óhefðbundið verkefni felur töluverðan kostnað í sér þó svo að margt efni er endurnýtt. Ef þú vilt aðstoða okkur í þessu frumkvöðlastarfi þar sem við reynum að koma með spennandi og skapandi verkefni fyrir nemendur þá endilega sendu línu á Valdimar skólastjóra valdimar@akmennt.is og við finnum út hvernig þú getur lagt skólanum lið við verkefnið.

Þetta er þriðja hlaðvarpið sem skólinn gefur út. En þetta hlaðvarp var unnið í valtímum og voru nemendur í 3-10.bekk sem komu að þessu.

Við stiklum á stóru er varðar sögu skólans en fáum einnig góðan gest í hlaðvarpið. Erla deildarstjóri kom og svaraði öllum þeim spurningum sem krakkarnir höfðu velt upp við gerð hlaðvarpsins. Erla hefur starfað við skólann í 20 ár og þekkir því starfsemina betur en flestir og þær breytingar sem hafa orðið á þessu tímabili.

Saga Hlíðarskóla – Hlaðvarp

Kæru nemendur, foreldrar og samstarfsfólk.

Við óskum ykkur gleðilegra jóla með þökkum fyrir samskiptin og samvinnuna á árinu sem er að líða.

Skólinn hefst að loknu jólaleyfi þriðjudaginn 6. janúar kl. 8:15 samkvæmt stundaskrá

Kærar kveðjur,

Skólastjórnendur

Þá er desember gengin í garð með allri sinni spennu og gleði. Þann 1 desember var jólaföndurdagur hjá okkur í Hlíðarskóla sem var bæði notalegur og góður. Nokkrir nemendur byrjuðu daginn á að skreyta gluggana í Eymundsson á meðan aðrir voru í allskonar jólabrasi í skólanum.

Eftir hádegið var svo foreldrum/forráðamönnum og systkinum boðið að koma í skólann og föndra allskonar jólalegt með nemendum. Viljum við þakka ykkur kærlega fyrir komuna og var virkilega gaman að sjá svona marga foreldra mæta hér í notalegheitin. Myndir frá deginum er hægt að skoða hér.

Ýmislegt skemmtilegt er á döfinni hjá okkur í mánuðinum og hlökkum við til að deila fleiri myndum af því rétt fyrir jól en vonum að jólastressið fari ekki með ykkur í millitíðinni 🙂

Um miðjan nóvember varð langþráður draumur nemenda skólans að veruleika þegar í notkun var tekinn kastali á skólalóðinni. Nemendur skólans hafa í mörg ár óskað þess að fá stærri leiktæki á svæðið og lögðu meðal annars söfnunarpening sinn í vekefnið fyrir nokkru. Fyrir valinu varð skip og hefur verið virkilega gaman að fylgjast með leik nemenda þar sem skipið nýtist öllum aldri vel.

Nemendur hafa fengist við ýmis verkefni utan þeirra hefðbundnu. Má þar nefna ferð á skauta í íþróttatíma í upphafi mánaðar. Boðið var upp á kynningu á júdó hjá KA í valtíma og fór stór hópur þangað og skemmtu sér vel og tóku vel á því. Hluti nemenda völdu að kynna sér fjölbreytta starfsemi Umhverfismiðstöðvar Akureyrar og fengu þar virkilega góðar móttökur og góða kynningu á þeim fjölmörgu verkefnum sem starfsfólk miðstöðvarinnar sinnir.

Gróðurhúsið er að taka á sig mynd hér á skólalóðinni og hafa flestir nemendur komið að smíði þess. Það verður gaman þegar það verður tilbúið og við getum farið að sækja grænmeti og ber í gróðurhúsið.

Mánudagurinn 1. desember verður undirlagður af jólaundirbúningi. Nemendur vinna að margskonar verkefnum, skreyta skólastofur sínar og nokkrir nemendur fara með honum Gumma í Eymundsson og mála jólamyndir á glugga verslunarinnar. Það verkefni er fyrir löngu búið að festa sig í sessi hér í skólastarfinu og höfum við átt mjög gott samstarf við verslunina í mörg ár.

Klukkan 12.40 til 14.00 verður svo jólaföndur þar sem foreldrum er boðið að koma í skólann eiga notalega stund með börnum sínum, fara á milli og útbúa margskonar fallega muni sem boðið verður upp á að gera. Vonandi sjá sem flestir sér fært að mæta og taka þátt með börnum sínum.

Hér á þessari slóð má sjá myndir frá skólastarfinu í nóvember.

Haldið var upp á hrekkjavöku með pompi og prakt í skólanum líkt og hefð hefur skapast fyrir undanfarin ár. Starfsfólk tók á móti nemendum í búningum og voru flestir nemendur í búningi sömu leiðis. Starfsfólk hafði lagt mikið á sig við að búa til “draugahús” í kjallaranum á gamla dvalarheimilinu. Þar mátti sjá drauga, nornir, skelfilega trúða og fleiri verur. Umhverfið í kjallaranum hentar einstaklega vel fyrir uppsetningu draugahúss og þökkum við Akureyrarbæ kærlega fyrir lánið á húsnæðinu. Að hausti er mikill spenningur í nemendum fyrir deginum og fær starfsfólk ófáar spurningar um það hvort það verði ekki örugglega draugahús á hrekkjavökunni. 
Það var slíkt fjör að fáar myndir voru teknar en einhverjar fylgja hér með.

Fleiri myndir frá október má finna í þessu albúmi: https://photos.app.goo.gl/3gVkAceaWS9CQfRE9 Það er alltaf nóg um að vera hjá okkur og hver stund nýtt til náms, úti og inni.