Þar sem við tökum flugið
Tónlistarmaðurinn Ágúst Þór Brynjarsson kom og heimsótti skólann í dag við mikinn fögnuð. Hann tók lagið í matsalnum og söng og spilaði fyrir okkur öll nokkur lög við góðar undirtektir.
Við þökkum honum hjartanlega fyrir komuna og hlökkum til að sjá meira til hans á komandi misserum í tónlistinni.
Myndir frá heimsókninni má sjá hér á þessum hlekk.
Nemendur hafa verið önnum kafnir við að vinna að námsverkefnum sínum undanfarnar vikur. Við höfum nýtt góða veðrið undanfarna daga til hins ýtrasta og hafa verið farnar margar ferðir í fjöruna og í móana hér ofan skólans í fuglaskoðun svo eitthvað sé nefnt. Nú eru farfuglarnir farnir að streyma að og njótum við þess að heyra í þeim og sjá.
Loks lét snjórinn undan svo nú hefur verið hægt að setja loft í ærslabelginn.
Miðvikudagurinn 22.apríl var hefðbundin kennsla brotin upp og haldið upp á sumarkomuna. Við hefðum ekki getað verið heppnari með veður þennan dag. Dagurinn hófst á fjölbreyttum leikjum sem efldu samvinnu og vináttu og endaði í Kjarnaskógi þar sem kveikt var í grilli og grillaðar pylsur. Við nýttum okkur svo aðstöðuna hér á skólalóðinni og kveiktum upp í „rörinu“ og grilluðum sykurpúða.
Nemendur hafa verið að vinna að því að byggja og reisa hús á skólalóðinni í vetur. Í dag var stór áfangi þegar seinasti hluti grindarinnar var settur á sinn stað. Nú er bara eftir að klæða húsið og klára frágang á því.
Einnig verður að minnast á gróðurhúsið okkar. Nú hafa nemendur sáð fyrir meðal annars, radísum, káli og gúrkum í gróðurhúsinu og bíðum við spennt eftir því að sjá plöntur koma upp úr moldinni.
Á þessum hlekk má sjá nokkrar myndir frá apríl. Fleiri eiga eftir að bætast við næstu daga.
Árshátíð skólans fór fram fimmtudaginn 26. mars. Óhætt er að segja að hún hafi verið mjög vel heppnuð. Allir bekkir höfðu unnið að gerð stuttmynda ásamt því sem nemendahópurinn allur sameinaðist um að skrifa handrit að og leika í mynd þar sem starfsfólk skólans var tekið fyrir af mikilli kímni. Um var að ræða samtals fjórar stuttmyndir auk spurningaleiks á léttu nótunum.
Nemendur tóku sig einnig til og bökuðu muffins, pizzasnúða, döðlugott og kornflekstoppa sem þeir seldu til fjáröflunar fyrir vorferðalög þeirra sem fyrirhuguð eru við lok skólaársins.
Hjartans þakkir kæru foreldrar og aðrir aðstandendur sem sáuð ykkur fært að koma og gleðjast með okkur.
Skólinn er nú í páskafríi og hefst kennsla að páskum loknum þriðjudaginn 7.apríl samkvæmt stundatöflu
Kæru nemendur, foreldrar og samstarfsfólk.
Við óskum ykkur gleðilegra jóla með þökkum fyrir samskiptin og samvinnuna á árinu sem er að líða.
Skólinn hefst að loknu jólaleyfi þriðjudaginn 6. janúar kl. 8:15 samkvæmt stundaskrá
Kærar kveðjur,
Skólastjórnendur
Um miðjan nóvember varð langþráður draumur nemenda skólans að veruleika þegar í notkun var tekinn kastali á skólalóðinni. Nemendur skólans hafa í mörg ár óskað þess að fá stærri leiktæki á svæðið og lögðu meðal annars söfnunarpening sinn í vekefnið fyrir nokkru. Fyrir valinu varð skip og hefur verið virkilega gaman að fylgjast með leik nemenda þar sem skipið nýtist öllum aldri vel.
Nemendur hafa fengist við ýmis verkefni utan þeirra hefðbundnu. Má þar nefna ferð á skauta í íþróttatíma í upphafi mánaðar. Boðið var upp á kynningu á júdó hjá KA í valtíma og fór stór hópur þangað og skemmtu sér vel og tóku vel á því. Hluti nemenda völdu að kynna sér fjölbreytta starfsemi Umhverfismiðstöðvar Akureyrar og fengu þar virkilega góðar móttökur og góða kynningu á þeim fjölmörgu verkefnum sem starfsfólk miðstöðvarinnar sinnir.
Gróðurhúsið er að taka á sig mynd hér á skólalóðinni og hafa flestir nemendur komið að smíði þess. Það verður gaman þegar það verður tilbúið og við getum farið að sækja grænmeti og ber í gróðurhúsið.
Mánudagurinn 1. desember verður undirlagður af jólaundirbúningi. Nemendur vinna að margskonar verkefnum, skreyta skólastofur sínar og nokkrir nemendur fara með honum Gumma í Eymundsson og mála jólamyndir á glugga verslunarinnar. Það verkefni er fyrir löngu búið að festa sig í sessi hér í skólastarfinu og höfum við átt mjög gott samstarf við verslunina í mörg ár.
Klukkan 12.40 til 14.00 verður svo jólaföndur þar sem foreldrum er boðið að koma í skólann eiga notalega stund með börnum sínum, fara á milli og útbúa margskonar fallega muni sem boðið verður upp á að gera. Vonandi sjá sem flestir sér fært að mæta og taka þátt með börnum sínum.
Hér á þessari slóð má sjá myndir frá skólastarfinu í nóvember.
Haldið var upp á hrekkjavöku með pompi og prakt í skólanum líkt og hefð hefur skapast fyrir undanfarin ár. Starfsfólk tók á móti nemendum í búningum og voru flestir nemendur í búningi sömu leiðis. Starfsfólk hafði lagt mikið á sig við að búa til “draugahús” í kjallaranum á gamla dvalarheimilinu. Þar mátti sjá drauga, nornir, skelfilega trúða og fleiri verur. Umhverfið í kjallaranum hentar einstaklega vel fyrir uppsetningu draugahúss og þökkum við Akureyrarbæ kærlega fyrir lánið á húsnæðinu. Að hausti er mikill spenningur í nemendum fyrir deginum og fær starfsfólk ófáar spurningar um það hvort það verði ekki örugglega draugahús á hrekkjavökunni.
Það var slíkt fjör að fáar myndir voru teknar en einhverjar fylgja hér með.
Fleiri myndir frá október má finna í þessu albúmi: https://photos.app.goo.gl/3gVkAceaWS9CQfRE9 Það er alltaf nóg um að vera hjá okkur og hver stund nýtt til náms, úti og inni.
Dagana15. og 16. október stóðu yfir hetjuþemadagar í Hlíðarskóla. Áður en dagarnir hófust mynduðu allir nemendur sína eigin hugmynd um ofurhetju og hvaða styrkleikar einkenndu hana og hverjir veikleikar hennar væru. Þannig voru nemendur vel undirbúnir fyrir þau skemmtilegu verkefni sem biðu þeirra.
🎨 Smiðjurnar
Nemendur fóru á milli og unnu verkefni í fimm fjölbreyttum smiðjum þar sem þeir gátu látið sköpunargáfuna fljúga frjálst:
🎬 Teiknimyndasmiðja
Nemendur bjuggu til sínar eigin teiknimyndir og færðu hetjur sínar til lífs í myndum.
⚔️ Hönnunarsmiðja
Hér voru hönnuð merki, spjót, skildir og önnur áhöld sem hæfa hetjunum.
🧵 Saumasmiðja
Skikkjur og grímur voru saumaðar og bættar til að klæða hetjurnar.
🎥 Kvikmyndasmiðja
Nemendur léku, tóku upp og klipptu saman stutta kvikmynd.
🤝 Hetja hópsins
Hóparnir bjuggu til sameiginlega ofurhetju sem samanstóð af hetjum allra í hópnum.
🏆 Hetjuleikarnir
Eftir hádegi seinni daginn fóru fram spennandi hetjuleikar þar sem nemendur kepptu í fimm skemmtilegum greinum. Flestir klæddust skikkjum og grímum sem þau höfðu búið til og báru áhöld sem tilheyrði hetjunum þeirra. Keppt var í :
⚡ Stígvélakasti
🥚 Eggjahlaupi
🏃 Kapphlaupi með sandpoka og hjólbörur
🎒 Pokahlaupi
📝 Raða texta í hetjulagi rétt saman
Að hetjuleikum loknum horfði allur skólinn á stórskemmtilega stuttmynd sem allir nemendur tóku þátt í að búa til og klippa.
Allt tókst virkilega vel og var verulega gaman að fylgjast með samvinnu, sköpun og dugnaði allra nemenda þessa daga.
Við þökkum öllum nemendum, og starfsfólki fyrir frábæra þátttöku í þessum skemmtilegu þemadögum. Það er gaman að sjá samfélag skólans okkar koma saman í sköpun, gleði og samvinnu!
Fleiri myndir frá þemadögunum má sjá á slóðinni: https://photos.app.goo.gl/wQHokvRNuvJtyABU8
Hliðarskóli verður settur föstudaginn 22.ágúst klukkan 10:30 í matsal skólans.
Nemendur fá stundatöflur sínar og tímaáætlun skólabílsins og fleiri gagnlegar upplýsingar um skólastarfið.
Bjóðum nýja og eldri nemendur og foreldra þeirra hjartanlega velkomin og hlökkum til samstarfsins næstkomandi vetur.
Skólaslit Hlíðarskóla fara fram í húsnæði skólans fimmtudaginn 5. júní klukkan 10.00.
Ekki verður rúta fyrir nemendur þann dag og er gert ráð fyrir að nemendur komi í fylgd foreldra.
Seinustu vikur hafa verið viðburðaríkar hér í skólanum. Í lok apríl voru haldnir Vorleikar. Um að ræða árlegan viðburð í skólanum sem hefur skipað fastan sess. Nemendur keppa í óhefðbundnum þrautum þar sem reynir á mismunandi færniþætti og heppni. Vorleikarnir heppnuðust mjög vel og enduðu á Áheitahlaupi nemenda og starfsfólks. Áheitahlaupið fer þannig fram að í aðdraganda hlaupsins ganga nemendur á milli starfsfólks og biður um áheit fyrir hverja ferð sem þeir hyggjst ganga/hlaupa upp heimreiðina að skólanum. Einnig söfnuðu nokkrir nemendur áheitum heima fyrir, meðal foreldra og annarra aðstendenda . Áheitasöfnun gekk vel og nemendur stóðu sig einnig virkilega vel í hlaupinu og náðu að safna samtals 225.400 krónum. Að þessu sinni ákváðu nemendur að styrkja ADHD samtökin og verður peningurinn afhentur samtökunum 28.maí næstkomandi. Við viljum þakka aðstandendum nemenda kærlega fyrir þeirra framlög til söfnunarinnar.
Hreinsunardagur var hér í upphafi maí. Þann dag nýttu nemendur til að fegra umhverfið okkar. Fjaran var gengin í norður og suður og söfnuðu nemendur rusli sem skolað hafði á land ásamt því sem dagurinn var nýttur í að laga til á skólalóðinni. Þemadagar voru svo haldnir 13. og 14. maí og var þemað að þessu sinni sjálfbærni. Nemendur fengu fræðslu um hugtakið auk þess sem unnið var að ýmsum verkefnum. Málaðir voru leikir á skólalóðina, merki skólans var málað á stafn skólabyggingarinnar, unnið var að því að smíða kofa undir trjáhúsinu, nemendur lærðu að kveikja eld og grilla sér brauð auk þess sem þeir fóru í ratleik um nágrennið. Hin árlega bátakeppni fór fram. Nemendur hafa í vetur verið að hanna og smíða báta sem þeir hafa lagt mikla natni við að gera sem glæsilegasta. Keppnin var æsispennandi og fór svo að lokum að mjótt var á munum milli sæta. Auk verðlauna fyrir hraðskreiðasta bátinn voru veitt „Skemmu verðlaun“ sem viðurkenning fyrir þá miklu vinnu sem nemendur lögðu í smíði og hönnun bátanna.
Vorinu fylgja gjarnan breytingar og nú í ár er engin undantekning á því. Nokkrir nemendur útskrifast við skólaslit sem fara fram 5. júní en auk þess útskrifaðist einn nemandi í þriðjabekk í seinustu viku. Við óskum honum og fjölskyldu hans alls hins besta um leið og við þökkum fyrir góð kynni og gott samstarf.
Sólveig uppeldisfulltrúi hættir störfum nú um mánaðarmót og eru henni færðar góðar kveðjur og þakkir fyrir allt hennar starf við skólann.
Myndir frá vordögum má finna hér fyrir neðan: