Author: Valdimar Heiðar Valsson

Haldinn var skólaráðsfundur hér í Hlíðarskóla 29.maí s.l.

Valdimar skólastjóri kynnti aðgerðaráætlun Hlíðarskóla til að verða réttindaskóli UNICEF næsta vor.

Nýtt nemenda og réttindaráð tók til starfa og við kvöddum réttindaráðið sem hafði starfað á þessu skólaári og þökkuðum þeim fyrir vel unnin störf. Einnig lætur foreldri af störfum í skólaráði og mun skólinn því þurfa að finna nýtt foreldri til að starfa í skólaráði næsta haust.
Við viljum þakka skólaráði fyrir vel unnin störf á árinu og hlökkum til að takast á við verkefni næsta skólaárs.

 

Þemadagar hafa staðið yfir í Hlíðarskóla þessa vikuna þar sem nemendur hafa unnið að fjölbreyttu og skapandi verkefni. Verkefnið fólst í að hanna eigið land frá grunni og móta allt sem því fylgir, meðal annars tungumál, stjórnarskrá, þjóðfána, skjaldarmerki, þjóðsöng og þjóðarrétt. 

Fréttamenn skólans fylgdust með vinnunni í stofunum, tóku viðtöl og söfnuðu upplýsingum um löndin sex sem urðu til í verkefnavinnunni. Hugmyndir nemenda voru mjög ólíkar og greinilegt að hóparnir höfðu lagt mikla vinnu í verkefnið. 

Í fyrsta hópnum voru Svandís, Viktor og Atli. Landið þeirra heitir Sviktali en nafnið er sett saman úr nöfnum þeirra. Landið leggur áherslu á hreint og snyrtilegt umhverfi og endurspeglast það í hugmyndum hópsins. Þjóðfáninn er svartur, grænn og rauður þar sem hvert þeirra valdi sinn lit. Tungumálið einkennist af stöfum sem eru speglaðir og á hvolfi. Þjóðarrétturinn kallast Drekabitar, kjúklingabitar bornir fram með sterkri sósu. 

Í öðrum hópnum voru Þröstur og Hafþór sem sköpuðu Halldóruland. Í landinu snýst margt um nafnið Halldór og samkvæmt lögum landsins mega aðeins þeir sem heita Halldór eða Halldóra stjórna landinu. Þjóðfáninn er svartur og hvítur og sögðu nemendur litina tengjast beltakerfi bardagaíþrótta. Hópurinn vakti athygli fyrir skýrar hugmyndir og skemmtilega framsetningu. 

Í þriðja hópnum voru Inga, Arný og Mattías sem sköpuðu land þar sem kuldi og snjór eru ráðandi einkenni. Skjaldarmerkið sýnir snævi þakta eyju með mörgæsum og jöklum. Litir þjóðfánans eru hvítur, blár og fjólublár sem undirstrika kalda ásýnd landsins. Þjóðarrétturinn er myntuís með Oreo-kexi sem þótti bæði óvenjuleg og skemmtileg hugmynd. 

Í fjórða hópnum voru Rósa, Evelyn og Ísak. Landið þeirra heitir Hissonia. Skjaldarmerki landsins er snákur og þjóðfáninn er rauður, svartur, gulur og grár. Í Hissoniu eru sérstök lög um góða umgengni við dýr og er landið konungsríki þar sem elsti erfingi tekur við stjórn. Landið er í laginu eins og Ísland nema því hefur verið snúið á hvolf. Tungumálið kallast „R-mál“ þar sem allar setningar byrja á bókstafnum R. Þjóðarrétturinn er mexíkósk kjúklingasúpa. 

Í fimmta hópnum voru Rikki, Magnús og Oliver sem hönnuðu landið Shmeckland. Íbúar landsins þurfa samkvæmt reglum að vera með smekk þegar þeir borða og skjaldarmerkið er einnig smekkur. Þjóðfáninn er svartur, grænn og rauður. Þjóðarrétturinn er snitsel með kartöflumús. Nemendur sögðu einnig frá kindinni Bob sem býr í landinu og getur talað öll tungumál heimsins. Tungumál landsins er blanda af mörgum tungumálum og landið sjálft er í laginu eins og smekkur. 

Í sjötta hópnum voru Erik, Stefán, Breki og Héðinn. Landið þeirra heitir Shebland og er nafnið myndað úr upphafsstöfum stjórnenda landsins. Þjóðfáninn og skjaldarmerkið eru hvít og fjólublá. Nemendur lögðu áherslu á sterka trú og samheldni í samfélaginu. Landið er gróðursælt og umlukið fjöllum. Þjóðarrétturinn er pastarör með beikoni, pepperóní, rjómaosti og piparosti. Konungur landsins heitir Jónas Haglabyssu Drekason. 

Þemadagarnir hafa einkennst af góðri samvinnu, fjölbreyttum hugmyndum og skapandi vinnu. Verkefnið gaf nemendum tækifæri til að vinna saman og þróa eigin samfélög með sínum eigin reglum, menningu og hefðum. 
 
Myndir sem að fréttamaður tók má finna hér : 
Þemadagar – Draumalandið – Google Photos 
 
Fyrir hönd Hlíðarskólafrétta 

Axel Dusan Þorgilsson 

Skólaráðsfundur 27.02.2026

Viðstaddir: Valdimar skólastjóri, Guðmundur fyrir hönd kennara, Halldór fyrir hönd annarra starfsmanna, Karen fyrir hönd foreldra, Rósa fyrir hönd nemenda og Natan fyrir hönd nemenda.

1. Skóladagatal fyrir veturinn 2026-2027 lagt fram og yfirfarið. Borið upp til samþykktar og samþykkt einróma.
2. Réttindaskóli UNICIEF. Valdimar fer yfir verkefnið og hvar það er statt. Spurningarlistar hafa verið lagðir fyrir nemendur. Næst á dagskrá er að gera öryggiskönnun. Það er talað um að hún sé framkvæmd í hóp. Spurningarnar spyrja um viðkvæm málefni þannig eftir að hafa skoðað listan að þá erum við í samtali við UNICIEF um hvort hægt sé að gera þetta öðruvísi. Mögulega hægt að gera einstaklings könnun en slíkt myndi tefja ferlið að sá sem leggur fyrir listan þurfi að gera það með hverjum og einum nemanda. Þegar niðurstöður úr báðum könnunum nemenda og öryggis að þá mun Valdimar skólastjóri og Nemendaráðið skoða niðurstöðurnar og út frá þeim gera aðgerðaráætlun til að vinna í þeim málum sem þarf að gera betur í. Það má segja að sú vinna sé að hluta til farin af stað því haldið var nemendaþing í nóvember þar sem nemendur ræddu ótal atriði tengdu skólanum. Hvað þau eru ánægð með og hvað má betur fara. Búið er að taka helstu niðurstöður saman og er unnið að úrbótum.
3. Farið var yfir útivistardaginn sem gekk mjög vel. Fengum gott veður og allt gekk að óskum.
4. Árshátíð er í fullum gangi. Allar stofur eru farnar að vinna hugmyndavinnu að sínum atriðum. Árshátíðin verður 26.mars
5. Farið var yfir rekstrarárið 2025 fyrir Hlíðarskóla. Áætlaðar voru rúmar 206 milljónir fyrir skólaárið 2025. Við enduðum í 209 milljónum sem er framúrkeyrsla upp á 1.28 prósent sem verður að teljast nokkuð gott þó viðmiðið sé alltaf að standast áætlun.
6. Farið var yfir komandi viðburði á skóladagatali. Næsti skerti dagur er 16.mars og hefur yfirskriftina stærðfræði í daglegu lífi. Þar verður þema dagsins stærðfræði og hún tengd við daglegt líf svo nemendur komi augu á hvernig hún nýtist dagsdaglega. Árshátíðin er svo eins og áður var sagt 26. mars. 
7. Undir önnur mál var rætt að þeir nemendur sem eru í nemendaráðinu eru að útskrifast í vor. Það er því útlit fyrir að það þurfi að fá nýja nemendur í réttinda/nemendaráðið til að halda áfram þeirri góðu vinnu sem hefur farið fram þar.

Fundi slitið.

Nú er hafið spennandi og skapandi þróunarverkefni þar sem Guðmundur smíðakennari leiðir nemendur saman í sameiginlegu verkefni þar sem nemendur smíða svokallað bamba-húsi.

Verkefnið hófst þegar skólinn fékk að gjöf nokkra bamba – en bambar eru stálgrindur sem venjulega eru utan um plasttanka (IBC-tanka). Við höfðum séð fyrirmyndir af svo kölluðum bamba húsum og vildum spreyta okkur á að gera eitt slíkt. Þetta myndi líka nýtast skólanum því oft er pláss að skornum skammti og því kæmi geymslu skúr sér vel á skólalóðinni.

Með hjálp gerfigreindar var hafist handa við að undirbúa verkefnið. Við erum sátt með niðurstöðuna. Húsið verður klætt að utan með timbri þar sem börkurinn snýr út – þannig að húsið minnir á náttúrulegt, hrátt tré og fellur vel inn í umhverfið. Þakið verður A-laga með bárujárni og byggingin verður á einni hæð, einföld og traust.

Það sem gerir verkefnið sérstaklega skemmtilegt er að allir nemendur koma að smíðinni 3-10.bekkur. Hver og einn fær hlutverk við hæfi:
– mælingar og skipulag
– samsetningu grindar
– festingar og styrkingar
– klæðning, frágang og útlitshugsun

Þannig verður verkefnið ekki aðeins smíðaverkefni, heldur lærdómsferli um samvinnu, lausnaleit, endurvinnslu og sjálfbærni.

Markmiðið er ekki bara að byggja hús – heldur að byggja þekkingu, sjálfstraust og sjálfbæra skólamenningu, þar sem hugmyndir nemenda verða að raunverulegum hlutum í umhverfi skólans.

Meðfylgjandi eru myndir af áætlun verkefnisins, hugmyndum að mögulegri lokaútkomu og einnig myndir frá vinnu nemenda.

Við erum afskaplega stoltur af þessu verkefni þar sem við sýnum nemendum að hugmyndir geta orðið að veruleika ef maður er tilbúin að leggja á sig vinnuna og láta verkin tala.

Við munum sýna ykkur frá framvindu mála með þetta verkefni. Einnig langar okkur að athuga hvort það eru einhverjir velunnarar þarna úti sem langar að leggja skólanum lið með þetta stórskemmtilega verkefni. Svona óhefðbundið verkefni felur töluverðan kostnað í sér þó svo að margt efni er endurnýtt. Ef þú vilt aðstoða okkur í þessu frumkvöðlastarfi þar sem við reynum að koma með spennandi og skapandi verkefni fyrir nemendur þá endilega sendu línu á Valdimar skólastjóra valdimar@akmennt.is og við finnum út hvernig þú getur lagt skólanum lið við verkefnið.

Þetta er þriðja hlaðvarpið sem skólinn gefur út. En þetta hlaðvarp var unnið í valtímum og voru nemendur í 3-10.bekk sem komu að þessu.

Við stiklum á stóru er varðar sögu skólans en fáum einnig góðan gest í hlaðvarpið. Erla deildarstjóri kom og svaraði öllum þeim spurningum sem krakkarnir höfðu velt upp við gerð hlaðvarpsins. Erla hefur starfað við skólann í 20 ár og þekkir því starfsemina betur en flestir og þær breytingar sem hafa orðið á þessu tímabili.

Saga Hlíðarskóla – Hlaðvarp

Fyrstu vikur skólaársins 2025-2026 hafa einkennst af fjölbreyttri starfsemi þar sem nemendur og starfsfólk hafa nýtt gott veður og tækifæri til að læra utan veggja skólastofunnar. Skólasetningin fór fram 22.ágúst og í kjölfarið hefur farið fram spennandi útinám sem á að hjálpa okkur að mynda tengsl, þjálfa okkur í félagsfærni og samvinnu.

Útikennsla og náttúruupplifun

Nemendur hafa farið í fjölbreyttar náttúruferðir þar sem þeir hafa fengið að upplifa íslenska náttúru í allri sinni fegurð. Ferðir í fjöruna í Skjaldarvík hafa veitt tækifæri til að rannsaka lífríki fjörunnar og síðan var farið í sjóferð með Húna II þar sem við fræddumst um lífríkið í sjónum, fengum að veiða og síðan var aflinn grillaður. Við vorum með göngudag þar sem við gengum frá mjólkursamsölunni og yfir í Kjarnaskóg þar sem við fórum í leiki og enduðum á grillveislu.

Vettvangsferðir og hagnýt nám

Meðal spennandi verkefna hefur verið ferð þar sem nemendur fengu að taka þátt í hagnýtri starfsemi við vötn og læki. Veiddu krakkarnir síli í háfa og settu í ílát. Slík verkefni kenna nemendum mikilvægi umhvernisvitundar og gefa þeim tækifæri til að sjá hvernig náttúrufræði tengist daglegu lífi.

Skólaárið fer vel af stað

Fyrstu vikurnar sýna vel hvað skólinn leggur áherslu á – að nám á sér stað víða, ekki bara í kennslustofum, og að mikilvægt er að efla samkennd og upplifa náttúru landsins. Byrjunin á skólaárinu fer heilt yfir vel á stað þó svo að það séu nóg af áskorunum til að takast á við. Við höldum ótrauð áfram og munum flytja ykkur frekari fréttir af skólastarfinu þegar fram líða stundir.

---

Hér má sjá fleiri myndir úr skólastarfinu

Fyrr í vetur sögðum við frá því þegar við misstum nánast allt ræktardótið okkar og var mikil sorg yfir því.

Nú horfir allt til betri vegar. Skólinn fékk góðan styrk úr minningarsjóði Baldvins Rúnarssonar sem gerði okkur kleift að kaupa eitthvað að nýju dóti. Við viljum þakka þeim sem standa að minningarsjóðnum kærlega fyrir styrkinn sem kom svo sannarlega að góðum notum. Einnig viljum við þakka Norður fyrir að taka vel á móti okkur en við gátum keypt ræktardót af þeim á góðu verði ásamt því að fá eitt og annað í kaupbæti. Einnig hafði fólk samband við okkur og vildi gefa okkur tæki og tól.

Það er afskaplega góð tilfinning að finna fyrir slíkum velvilja í garð skólans. Við munum halda ótrauð áfram að byggja upp aðstöðuna í skólanum og gera hana eins góða og völ er á því þessir krakkar eiga það svo sannarlega skilið.

Kæru foreldrar / forráðamenn leik- og grunnskólanemenda á Akureyri

Eins og mörgum er kunnugt, þá stendur yfir innleiðing laga um samþætta þjónustu í þágu farsældar barna, sem í daglegu tali eru kölluð farsældarlögin. Nú er kominn nýr og aðgengilegur vefur sem kallast Farsæld barna og þar má finna nánari upplýsingar um hvað löggjöfin felur í sér og hvert hlutverk tengiliða er. Einnig má sjá aðgengilegt myndband sem lýsir í stuttu máli því sem lögin innibera.

Samkvæmt lögunum eiga börn og foreldrar að hafa greiðan aðgang að þeirri þjónustu sem þau þurfa og að þau fái rétta aðstoð á réttum tíma, frá réttum aðilum. Með því að tengja þjónustuna saman og vinna í sameiningu að farsæld barna verður auðveldara fyrir börn og foreldra að fá aðstoð við hæfi. 

Börn og foreldrar þeirra hafa aðgang að tengilið í skóla. Á heimasíðu skólans, Farsæld barna – Hlíðarskóli Akureyri (hlidarskoli.is) má sjá hver hefur hlutverk sem tengiliður í Hlíðarskóla. Hlutverk tengiliðar er fyrst og fremst að veita upplýsingar, aðstoða foreldra og barn og styðja við samþættingu á fyrsta stigi í samræmi við óskir foreldra og/eða barns. Í flóknari málum hafa börn og foreldrar aðgang að málstjóra hjá velferðarsviði Akureyrarbæjar eða þar sem þarfir barns liggja hverju sinni. Foreldrar og börn geta leitað sjálf beint til tengiliðar eða sent beiðni í gegnum Þjónustugátt Akureyrarbæjar.

Með góðri farsældarkveðju,

Helga Vilhjálmsdóttir, innleiðingarstjóri farsældarlaga á fræðslu- og lýðheilsusviði

Kristín Jóhannesdóttir, sviðsstjóri fræðslu- og lýðheilsusviðs

Valdimar Heiðar Valsson, skólastjóri Hlíðarskóla

Skólasetning Hlíðarskóla fer fram þriðjudaginn 22.ágúst klukkan 10:00. Engin skólarúta er þann daginn og koma því  nemendur með aðstandendum sínum.

Þann 11.maí fór fram nemendaþing hér í Hlíðarskóla. Nemendum var skipt í 4 hópa þvert á aldur og var hverjum hóp skipaður borðstjóri sem var kennari. Borðstjórinn bar upp umræðuefnið og sá til þess að allir fengu jöfn tækifæri til þess að tjá þig. Borðstjóri sá einnig um að skrifa niður allt sem kom fram hjá hópunum. Tilgangurinn með nemendaþinginu var að gefa nemendum vettvang til að láta ljós skoðanir sýnar á hin ýmsu málefni tengdu skólastarfi Hlíðarskóla. Gögnunum  verður síðan safnað saman, þau yfirfarin og notuð til að bæta skólastarf Hlíðarskóla. Við viljum þakka nemendum fyrir frábæra vinnu á nemendaþinginu og hlökkum til að hefjast handa að vinna úr þeim punktum sem komu fram til að efla og bæta skólastarfið.

Hér fyrir neðan má sjá myndir af hópunum.