Hlíðarskóli Akureyri

Við í Hlíðarskóla höfum verið að vinna í spennandi verkefnum undanfarið og langaði okkur að segja ykkur frá verkefni sem nemendur í stofu 3 hafa verið að vinna. Þau hafa mikinn áhuga á hlaðvörpum og við tókum það bara alla leið og gerðum okkar eigið hlaðvarp. Fyrsti viðmælandi hlaðvarpsins var Helgi Sæmundur annar meðlima Úlfur Úlfur en hann kom einnig í heimsókn í Hlíðarskóla og ræddi við nemendur um ferilinn, lífið og allt milli himins og jarðar.



Við viljum þakka Helga fyrir heimsóknina og fyrir að taka þátt í verkefninu með okkur.

Einnig viljum við þakka Podcast Studio Akureyrar fyrir alla hjálpina í tengslum við hlaðvarpið.

Að lokum vill skólinn þakka Oddný Þroskaþjálfanum okkar fyrir að leiða þetta verkefni og látið það verða að veruleika.

Hér er þátturinn: https://hlidarskoli.podbean.com/

Birtum hér tölvupóst sem var að berast og var einnig sendur á alla foreldra í gegnum mentor.

Skólahaldi aflýst

Á fundi aðgerðarstjórnar Almannavarna á Norðurlandi eystra núna seinnipartinn var þeim tilmælum beint til sveitarfélaga að aflýsa á morgun öllu skólahaldi í leik-, grunn- og tónlistarskólum á grundvelli veðurspár. Búist er við að bæði veðurhæð og aðstæður á okkar svæði verði með þeim hætti að enginn ætti að vera á ferli þegar veðrið gengur yfir.  Því hefur verið ákveðið að fella niður skólahald bæði í leik- og grunnskólum Akureyrar og tónlistarskólanum á morgun mánudaginn 7. febrúar. Allt starfsfólk er beðið um að halda kyrru fyrir heima meðan veðrið gengur yfir.

Ákvörðun sem þessi hefur ekki verið tekin áður með þessum hætti en í ljósi þess að búið er að hækka viðbúnaðarstig og helstu sérfræðingar tala fyrir slíkri ákvörðun er þá er hún tekin. Vonandi gengur veðrið yfir á fáum klukkutímum en þar sem reikna má með að það taki nokkra klukkutíma að opna helstu leiðir innanbæjar eftir að veðrinu slotar þá er ólíklegt að ferðafært verði á morgun.

Aðgerðarstjórn mun fylgjast með framvindu mála og senda út tilkynningu þegar óhætt verður að vera á ferli.
Með kveðju,

Karl Frímannsson

sviðsstjóri fræðslu- og lýðheilsusviðs Akureyrarbæjar

Það er appelsínugul viðvörun fyrir morgundaginn og því mikilvægt að foreldrar kynni sér ferlið þegar tvísýnt er með skólahald.

Mikilvægt er að foreldrar fylgist vel með veðri og færð. Ef þeir treysta börnum sínum ekki í skólann er óskað eftir því að þeir hringi og láti vita. Síminn í skólanum er 414-7980. Í einstaka tilfellum er skólahaldi aflýst og kemur þá tilkynning um það á Rás2 að morgni ásamt því að tilkynning verður birt hér á heimasíðunni. Við tvísýnar aðstæður sem geta verið breytilegar eftir bæjarhlutum þá er það ávallt foreldra/forráðamanna að meta hvort þeir treysti börnum sínum í skólann.

1.      Meginreglan er sú að leik- og grunnskólar eru opnir nema lögregla gefi út tilmæli um að fólk sé ekki á ferli.

2.      Ef skólahald fellur niður þá sendir skóladeild tilkynningu þess efnis á RÚV og Bylgjuna fyrir kl. 7.00 að morgni.

3.       Öllum skólum ber að setja tilkynningu á heimasíðu í þeim tilfellum sem tvísýnt er með veður og færð eða þegar skólahald er fellt niður. Einnig skulu skólar senda út póst í Mentor með sömu tilkynningu.

4.       Við tvísýnar aðstæður sem geta verið breytilegar eftir bæjarhlutum þá er það ávallt foreldra/ forráðamanna að meta hvort þeir treysti börnum sínum í skóla.

5.       Ef skólahaldi er ekki aflýst er tryggt að starfsfólk sé til staðar á auglýstum skólatíma í öllum skólum. Börn sem koma í skólann eru ekki send heim áður en skólatíma lýkur.

Starfsfólk Hlíðarskóla óskar öllum gleðilegra jóla og farsældar á nýju ári.

Á morgun er starfsdagur hjá starfsfólki Hlíðarskóla og því engin kennsla.

Skólahald hefst aftur samkvæmt stundaskrá miðvikudaginn 24.11.2021.

Í dag var brotið blað í sögu Hlíðarskóla en þá fór fram fyrsti fundur skólaráðs Hlíðarskóla.

Hér fyrir neðan má sjá fundargerð.

Skólaráðsfundur Hlíðarskóla.

Mánudagur 22.11.2021 klukkan 12:40

Mættir:  Valdimar (skólastjóri), Bibbi (fulltrúi kennara), Anton (fulltrúi annars starfsfólks), Lúkas (fulltrúi nemenda), Alla (fulltrúi nærumhverfis), Sigríður (fulltrúi foreldra)

Dagskrá

1. Farið yfir hlutverk skólaráðs, verkefni og fleira

Valdimar fór yfir hlutverk ráðsins.  Það eiga að sitja 9 í ráðinu og þar af 2 foreldrar og 2 kennarar 1 annað starfsfólk, 2 nemendur, 1 fulltrúi í grennd og skólastjóri.  Vegna smæðar skólans er horft í gegnum fingur sér með 2 fulltrúa og látið nægja að 1 fulltrúi hvers aðila sé í ráðinu.

Skólaráð er samráðsvettvangur skólastjóra og skólasamfélagsins, það skal, auk skólastjóra, skipað fulltrúum foreldra, nemenda, kennara, annarra starfsmanna og fulltrúa grenndarsamfélags sem í okkar tilfelli er velunnari skólans og fyrrum starfsmaður.

Skólaráð fundar einu sinni á önn að minnsta kosti, eða þegar þörf er á. Hlutverk þess skv. lögum er að taka þátt í stefnumörkun fyrir skólann, að ræða og veita álit á málum eins og skólanámskrá, starfsáætlun, hvers kyns breytingum á skólahaldi, aðbúnaði og velferð nemenda, húsnæðis- og öryggismálum o.s.frv.  Þá fjallar ráðið einnig um erindi frá ýmsum aðilum (t.d. skólanefnd, foreldrum, nemendaráði o.s.frv.) og veitir umsagnir ef þess er óskað. Skólaráð er því mikilvægur þáttur í því að koma sjónarmiðum sem flestra á framfæri og tryggja samráð við þá sem koma að málefnum skólans áður en endanlegar ákvarðanir eru teknar.

Nánari upplýsingar um skólaráð má finna hér.

http://www.heimiliogskoli.is/wp-content/uploads/2017/06/Handb%C3%B3k-um-sk%C3%B3lar%C3%A1%C3%B0.pdf

http://www.naustaskoli.is/static/files/fundargerdir_skolarad/baeklingur_skolarad_ub_.pdf

2. Rekstraráætlun fyrir næsta skólaár.  Rekstraráætlun ekki tilbúin og verður kynnt síðar.

3. Breyting á skóladagatali. Stefnum á að færa litlu jól Hlíðarskóla frá 20. des til 17. des

Búið að nefna við foreldra og senda póst og óska eftir athugasemdum en engar hafa borist.  

Breytingin borin undir skólaráð og samþykkt einróma.

4. Erindi frá nemendum í stofu 2 og stofu 4

Nemendur voru beðnir um að koma með sínar tillögur til úrbóta í skólanum.  Margar tillögur komu fram og voru ræddar á fundinum.

Ýmislegt af því sem var stungið upp á kallar á að endurskipuleggja stofur og húsnæði.  Ákveðið að taka fyrir á fundi á starfsdegi sem er á morgun 23.11.2021 og skoða útfærslumöguleika.

5.  Endurbætur á skólalóð

Endurbætur á skólalóð ganga hægt.  Loforð um úrbætur eru ekki uppfyllt en það þarf að halda áfram að ýta á þá sem eiga að sjá um framkvæmdir.  Yfirbygging á porti í Skjaldarhúsi er á bið eftir Covid.  Áhersla lögð á endurbætur á skólalóðinni.

6. Önnur mál.

Næsti fundur mánudaginn 14. mars klukkan 12:40.

Þá er enn ein vikan að renna sitt skeið.

Á mánudaginn 8.nóvember var uppbrotsdagur hjá okkur þar sem unnið var með einelti á margskonar þátt. Dagurinn gekk vel og unnu nemendur vel og á fjölbreyttan þátt.

Við höfum stofnað Tiktok aðgang fyrir skólann og heitir hann Hlíðarskóli Akureyri. Við ætlum að reyna að vera dugleg að setja inn efni þarna og nú þegar er komið frá „degi eineltis“ sem var s.l. mánudag.

Í næstu viku nánar þriðjudaginn 16.nóvember er dagur íslenskrar tungu. Þá verður unnið með tungumálið okkar og verður gaman að sýna ykkur afraksturinn af þeirri vinnu. Einnig munum við vinna með barnasóttmálann í lok vikunnar.

Góða helgi.

Þá er enn ein vikan að hefjast hérna hjá okkur í Hlíðarskóla eftir vel heppnaðan hrekkjavökudag föstudaginn seinasta.

Draugahúsið var einstaklega vel heppnað og höfðu krakkarnir gaman af. Við spiluðum líka bingo og var spennan oft mikil þegar margir áttu bara nokkrar tölur eftir. Við enduðum síðan daginn á að horfa á hrekkjavökumynd og poppuðum fyrir nemendur.

Þessi vika verður með hefðbundnu sniði en mánudaginn 8.nóvember að þá er baráttudagur gegn einelti og mun dagurinn hjá okkur að mestu snúast um það.

Við munum fjalla um einelti á margskonar hátt og frá mörgum hliðum. Hlökkum við mikið til þeirrar vinnu enda mjög mikilvægt málefni að vinna með.

Núna á næstu dögum mun ég senda á alla foreldra og óska eftir aðila í skólaráð. Þetta verður ekki mikil kvöð á foreldra en reiknað er með að funda einu sinni á önn en oftar ef þörf er á.

Með von um frábæra viku.

kv. Valdimar

Skólastjóri Hlíðarskóla.

Á morgun verður hrekkjavaka hjá okkur í Hlíðarskóla.

Nemendur sem treysta sér til verður boðið að fara í gegnum draugahús sem búið er að útbúa upp í skyldi.

Annað sem verður gert er að horfa á mynd, nemendur fá popp með myndinni og síðan munum við spila Bingo. Vegna hrekkjavökunnar að þá verður ekki sund á morgun heldur fer öll dagskráin fram hér í Hlíðarskóla.

Allir nemendur mega koma í búning á morgun og væri gaman að sjá sem flesta koma í búning.

Hlökkum til að eiga frábæran dag með nemendum okkar á morgun.

Á morgun verður hin árlegi göngudagur sem endar með grillveislu í Kjarnaskógi.

Það spáir mjög góðu veðri og því væri sniðugt að nemendur myndu taka með sér vatnsbrúsa að heiman til að hafa eitthvað að drekka á leiðinni.

Einnig er mikilvægt er að nemendur komi í þægilegum fötum og góðum gönguskóm.

Kv. Valdimar Heiðar Valsson

Skólastjóri Hlíðarskóla.