Author: Valdimar Heiðar Valsson

Mánudaginn 2.maí er starfsdagur í Hlíðarskóla.

Á föstudaginn 29.apríl fór fram vorleikar og árshátíð Hlíðarskóla 2022.

Fyrir hádegi var keppt í vorleikunum sem innihélt 18 keppnisgreinar/þrautir.

Þær þrautir voru:
1.Setja saman legó á tíma.

2. Halda kúlu á lofti með borðtennisspaða.

3.Olsen olsen keppni

4.Jenga

5.Pennalyftur.
6.Vísnaþraut.
7.Dans í haldi

8. Hver getur kastað frisbídisk lengst

9.Halda bolta á lofti og segja brandara.

10.Flöskuflipp.

11.Spilablástur

12.Hitta penna sem var bundinn við mann ofan í flösku.

13.Teikniþraut

14.Skjóta 10 skotum á körfu.

15. Ferja vatn í fötu með diskum.

16.Kubbur.

17.Crossfit.

18.Skóspark
Það er óhætt að segja að keppnin var æsispennandi og var virkilega mjótt á mununum.

Síðan var grillað pylsur í hádeginu og kl 13:00 komu foreldrar á Árshátíð.

Byrjuðum við á að spila Kahoot sem nemandi hafði samið og voru spurningarnar um starfsfólk Hlíðarskóla.

Yngri deildin sýndi myndband af þeim Bakkabræðrum (Gísla, Eirík og Helga) aldeilis glæsilegt hjá þeim og síðan var flutt myndband sem bar nafnið starfsmannagrín. Þar brugðu nemendur sér í gerfi starfsmanna og gerðu grín af þeim með stórskemmtilegum árangri. Buðum við síðan upp á veitingar og síðan spiluðu nemendur við foreldra sína uppáhalds spilin sín í skólanum.

Aldeilis frábær dagur hjá okkur og nemendur eiga stórt hrós skilið hversu duglegir og jákvæðir þeir voru allan daginn.
Hér má sjá nokkra nemendur reyna við teikniþrautina.

Í gær kom snjallvagninn í heimsókn en þeir sinna fræðslu unglinga um stafræna borgaravitund og hegðun á netinu í samstarfi við Huawei. Fræðslan hefur farið fram á netinu hingað til en nú er loksins komið svigrúm til að mæta á staðinn og kynna efnið . Fræðslan er hönnuð af sérfræðingum Evrópuráðsins. Fræðslan hefur verið í höndum Lalla töframanns sem fræðir krakkana ásamt því að vera með skemmtun inn á milli. Fræðslan var gagnvirk þar sem krakkarnir svöruðu spurningum á snjalltækjunum sínum í fyrirlestrinum og fá niðurstöðu í lokin hvernig “netkarakter” þau eru.

Virkilega gaman að fá þau í okkar litla skóla og fjalla um mikilvægt málefni hvernig við hegðum okkur á netinu.

Stefnan var að fara í Hlíðarfjall á morgun en ferðinni hefur nú verið frestað til föstudagsins 25.mars.
Það er ágætis spá fyrir föstudaginn og vonandi helst hún þannig.

Stefnan er að fara í Hlíðarfjall 24.mars ef veður leyfir.
Póstur hefur verið sendur á forráðarmenn nemenda með öllum helstu upplýsingum.
Nú er bara að krossa fingur og vona að við fáum gott veður.

Í seinustu viku fengu nemendur að velja hvað væri í hádegismatinn.
Byrjað var að fá hugmyndir hvað ætti að vera í matinn og þegar það voru komnar nokkrar tilnefningar að þá var einvígi (head to head) milli máltíða. Það fór þannig fram að tvær máltíðir voru nefndar og áttu nemendur að velja á milli. Sú máltíð sem fékk fleiri atvkæði fór áfram en hin datt út. Svona var gert alveg þangað til að ein máltíð stóð eftir sem sigurvegari.
Sú máltið sem krakkarnir völdu var TACO en einnig var boðið upp á Tortilla kökur.


Hér má sjá vaska menn taka sér stöðu að til að skammta matinn enda veitti ekki af slík var ásóknin í matinn og nemendur í skýjunum yfir þessu uppátæki. Ákveðið var í skólaráði að þetta skuli gert einu sinni á önn og einnig verði óvæntur öðruvísi morgunmatur einu sinni á önn.

Skólaráðsfundur Hlíðarskóla 14. mars 2022

Haldin í Skildi klukkan 12:40

Mættir:  Valdimar, Bibbi, Lúkas, Sigríður.  Alla og Anton eru veik.

1. Fjárhagsáætlun Hlíðarskóla.

Fjárhagsáætlun er ekki að fullu tilbúin en verður kynnt þegar hún er klár. 

2. Skóladagatal 22/23.  

Samþykkt einróma (með þeim breytingum sem bent var á varðandi talningu á gulum dögum.)

3. Útivistardagurinn 24. mars

Farið verður í Hlíðarfjall 24. mars en ef veður verður slæmt þá er 28. mars til vara.  Verið er að safna upplýsingum um búnað, hvað vantar nemendur.  Skólinn bjargar nemendum um þann búnað sem vantar. Skólinn mun skaffa nemendum nesti á útivistadeginum.

4. Árshátíð / vorleikar

Árshátíð / vorleikar verða haldnir föstudaginn 29. apríl.  Byrjað verður bráðlega á að skipuleggja þennan dag.  Undanfarin tvö ár hefur árshátíð fallið niður.

5. Erindi frá nemendum

Fá stærri sandkassa

Sandkassinn er kominn til Akureyrar og beðið er eftir því að hann verði settur niður þegar færi gefst. 

Fá betri rólu og kastala úr timbri. 

Farið verður með óskir um bætta aðstöðu á útisvæði í fasteignir Akureyrar.   Útisvæðið þarf að bæta verulega, því er verulega ábótavant og ósk um rólu og kastala er í þeim pakka.

Getum við haft öðruvísi morgunmat einu sinni í mánuði

Búið er að semja um að hafa öðruvísi morgunmat einu sinni á önn. Stefnt að því að hafa það þegar allir nemendur eru mættir. 

Einnig var samið um öðruvísi hádegismat einu sinni á önn. Miðað er við að það sé þegar starfsdagur á Iðavelli.

Getum við haft dótadag?

Samþykkt að hafa dótadag einu sinni á önn.

Er hægt að hafa gistinótt í skólanum?

Það er erfitt að bjóða upp á að gista en möguleiki á að hafa kvöldskemmtun fyrir bekkinn.

Er hægt fá að koma með frjálst nesti einu sinni á önn.

já.  Það er góður möguleiki og verður skoðað hvenær hentar best.

Er möguleiki á að fá aðra körfu.  

Rætt var um körfuboltavöllinn og ákveðið að kanna annars vegar að setja upp tvær körfur og völl og hins vegar að koma upp körfu í minni hæð fyrir yngri nemendur.

Þythokký eða poolborð í tölvustofu.  

Þetta verður skoðað í samhengi við annað sem á að koma þar að.

Er hægt að koma upp vatnsvél?

Umræður og niðurstaðan er að hafa vatnskönnur í hverri stofu og glas merkt hverjum nemanda.

Gervigrasvöllur í stað fótboltavallar sem er fyrir.  Allir skólar á Ak hafa svoleiðis nema Hlíðarskóli.

Ákveðið að fara fram á það við Akureyrarbæ að kanna hvort af þessu geti orðið.  

Beiðni um að hafa leyfi fyrir því að hafa húfu inni.

Það eru kostir og gallar.  Samþykkt var að hafa tilraunaverkefni fram að páskum að leyfa húfur í tímum, ekki í matsal, íþróttum eða sundi.  Húfur sem eru blautar, illa lyktandi eða skítugar verða eftir í forstofu / fatahengi.  Kennarar dæma um það hvort húfur séu hreinar og til þess fallnar að vera á höfði nemanda í tíma.

6.  Önnur mál.

Engin önnur mál.

Næsti fundur mánudagur 9. maí klukkan 12:40.

Fundi slitið 13:40.

Í dag var óvæntur/óhefðbundinn morgunmatur hjá okkur í Hlíðarskóla. Boðið var upp á french toast, eggjahræru, bacon, ostastangir, bakaðar baunir og pylsur.
Krakkarnir voru flest öll í skýjunum yfir þessu uppbroti þó svo að einhverjir hefðu frekar viljað gamla góða hafragrautinn ?

Því miður gleymdist að taka myndir en við ætlum að reyna vera duglegri við það á næstunni ef það er tilefni til.

Á skóladagatalinu okkar stendur að við eigum útivistardag 16.mars. Sá dagur hefur verið færður til 24.mars og munum við hafa 28.mars til vara sé veður vont þann 24.mars. Nánari upplýsingar um daginn koma þegar nær dregur.

Við í Hlíðarskóla höfum verið að vinna í spennandi verkefnum undanfarið og langaði okkur að segja ykkur frá verkefni sem nemendur í stofu 3 hafa verið að vinna. Þau hafa mikinn áhuga á hlaðvörpum og við tókum það bara alla leið og gerðum okkar eigið hlaðvarp. Fyrsti viðmælandi hlaðvarpsins var Helgi Sæmundur annar meðlima Úlfur Úlfur en hann kom einnig í heimsókn í Hlíðarskóla og ræddi við nemendur um ferilinn, lífið og allt milli himins og jarðar.



Við viljum þakka Helga fyrir heimsóknina og fyrir að taka þátt í verkefninu með okkur.

Einnig viljum við þakka Podcast Studio Akureyrar fyrir alla hjálpina í tengslum við hlaðvarpið.

Að lokum vill skólinn þakka Oddný Þroskaþjálfanum okkar fyrir að leiða þetta verkefni og látið það verða að veruleika.

Hér er þátturinn: https://hlidarskoli.podbean.com/

Birtum hér tölvupóst sem var að berast og var einnig sendur á alla foreldra í gegnum mentor.

Skólahaldi aflýst

Á fundi aðgerðarstjórnar Almannavarna á Norðurlandi eystra núna seinnipartinn var þeim tilmælum beint til sveitarfélaga að aflýsa á morgun öllu skólahaldi í leik-, grunn- og tónlistarskólum á grundvelli veðurspár. Búist er við að bæði veðurhæð og aðstæður á okkar svæði verði með þeim hætti að enginn ætti að vera á ferli þegar veðrið gengur yfir.  Því hefur verið ákveðið að fella niður skólahald bæði í leik- og grunnskólum Akureyrar og tónlistarskólanum á morgun mánudaginn 7. febrúar. Allt starfsfólk er beðið um að halda kyrru fyrir heima meðan veðrið gengur yfir.

Ákvörðun sem þessi hefur ekki verið tekin áður með þessum hætti en í ljósi þess að búið er að hækka viðbúnaðarstig og helstu sérfræðingar tala fyrir slíkri ákvörðun er þá er hún tekin. Vonandi gengur veðrið yfir á fáum klukkutímum en þar sem reikna má með að það taki nokkra klukkutíma að opna helstu leiðir innanbæjar eftir að veðrinu slotar þá er ólíklegt að ferðafært verði á morgun.

Aðgerðarstjórn mun fylgjast með framvindu mála og senda út tilkynningu þegar óhætt verður að vera á ferli.
Með kveðju,

Karl Frímannsson

sviðsstjóri fræðslu- og lýðheilsusviðs Akureyrarbæjar